kutubhona

Ҳарбий кофир – мусулмонлар зиммасига (ҳимоясига) кирмаган ҳар бир кофирдир. У муоҳид бўладими, мустаъминми ёки бошқами, бунинг фарқи йўқ. Агар Исломий давлат билан қайсидир кофир давлат ўртасида шартнома тузилган бўлса, ана шу давлат фуқаролари муоҳидлар бўлиб, уларга ўртамиздаги ана шу шартнома бўйича муомала қилинади ва шу шартномадаги ҳар бир нарса ижро қилинади. Бироқ шартнома мавжуд бўлса ҳам муоҳид кофирлар ҳукман ҳарбий кофирлар эканликлари доирасидан чиқиб қолишмайди. Чунки шартнома муддати тугаши ёки улар ё биз томондан шартнома бузилиши биланоқ улар бошқа кофирлардек яна ҳарбий кофирлар ҳукмида бўлиб қолишади. Шунинг учун уларга қурол-аслаҳа ва ҳарбий хом-ашёларни сотиш ман қилинади. Агар бунда мусулмонлар зиёнига уларни кучайтириш бўлса бу нарсаларни уларга сотиш ман қилинади. Аммо агар уларга қурол-аслаҳа ва ҳарбий хом-ашёларни сотиш уларни кучайтиришга олиб келмаса, у ҳолда уларга бу нарсаларни сотиш ман қилинмайди. Хусусан Исломий давлат бугунги кундаги буюк давлатлар каби қурол-аслаҳа ишлаб чиқарадиган ва уни сотадиган давлатга айланганида уни сотиш ман қилинмайди. Агар шартномада уларга қурол-аслаҳа ва ҳарбий хом-ашёларни сотиш жоизлиги айтилган бўлсаю, лекин бунда мусулмонлар зиёнига уларни кучайтириш бўлса бу шартга вафо қилинмайди. Чунки у шариатга хилофдир. Шариатга хилоф бўлган ҳар қандай шарт ботил бўлиб, бундай шарт билан шартнома тузилмайди.

Аммо агар биз билан улар ўртасида ҳеч қандай шартнома бўлмаса у ҳолда улар ҳарбий кофирлар бўлишади. Бунда биз билан улар ўртасида амалда уруш ҳолати мавжуд бўладими ёки йўқми, бунинг фарқи йўқ. Бу пайтда улар мусулмонлар юртларига фақат ҳар сафар алоҳида маҳсус омонлик олиш билангина кира олишади. Акс ҳолда кира олишмайди. Улар мусулмонлар юртларида фақат чекланган муайян муддатгача яшашлари мумкин, холос. Энди амалда уруш ҳолатида бўлган ҳарбий кофир давлат билан амалий уруш ҳолатида бўлмаган ҳарбий кофир давлат ўртасидаги фарққа келсак у шундан иборатки, амалий уруш ҳолатидаги давлат билан сулҳдан олдин ҳеч қандай шартнома тузилмайди ва унинг фуқароларидан ҳеч кимга омонлик берилмайди. Фақат Аллоҳ каломини эшитиш учун келса ёки мусулмонлар юртларида яшайдиган зиммий бўлиш учун келсагина омонлик берилади. Амалий уруш ҳолатида бўлмаган ҳарбий давлатга қилинадиган муомала эса бунинг аксидир. Чунки бундай давлат билан тижорий, яхши қўшничилик ва бошқа шартномалар тузилади, унинг фуқароларига исломий юртларга тижорат ёки саёҳат ёки бошқа мақсадларда кира олишлари учун омонлик берилади.